Artur Beterbiýew bilen Dmitriý Biwolyň arasynda ýarym agyr agramda absolýut çempion diýen ady almak ugrundaky rewanş duşuşygy Er-Riýadda geçiriljek boks agşamynyň esasyny düzer. Söweş 2025-nji ýylyň 22-nji fewralynda bolar diýip, Sports.ru habar berýär.
Öňde geçiriljek ýaryşyň esasy kardyny (duşuşyklaryň tertibini) Saud Arabystanyndaky Baş güýmenjeler müdirliginiň başlygy Turki Al eş-Şeýh neşir etdi.
Beterbiýew bilen Biwolyň arasyndaky ilkinji tutluşykda eminler köpliginiň karary bilen Beterbiýew ýeňipdi.
Beterbiýew professional ýaryşda 21 ýeňiş gazandy (20 nokaut bilen). Asly çeçenli türgen ringde Kanadanyň adyndan çykyş edýär.
Gyrgyzystanly türgen Biwolyň hasabynda 23 ýeňiş we bir ýeňliş bar.
WBC-iň wersiýasy boýunça orta agram derejesinde dünýä çempiony dominikaly Karlos Adames (24-1, 18 KO) hökmany bäsdeşi, britaniýaly Hamza Şiraz (21-0, 17 KO) bilen bäsleşer.
Häzirki çempion, britaniýaly Daniel Dýubua bilen täze zelandiýaly Jozef Parkeriň arasyndaky IBF-iň agyr agram derejesindäki guşagyny almak ugrundaky başa-baş söweş boks ýaryşynyň esasy çäresi bolar.
Mundan başga-da, WBC-iň ýeňil agram derejesindäki dünýä çempiony, amerikaly Şakur Stiwenson (22 ýeňiş, 10 nokaut) ýaş bäsdeşi we watandaşy Floýd Şofild (18 ýeňiş, 12 nokaut) bilen duşuşar.
