Counterpoint Research analitik kompaniýasy 2024-nji ýylyň üçünji çärýeginde eplenýän smartfonlaryň bazaryndaky barlaglarynyň netijelerini paýlaşdy. Geçen alty çärýegiň dowamyndaky ösüşden soň, hasabat döwründe, geçen ýyl bilen deňeşdirilende, bu smartfonlaryň bahasynyň 1% peselendigi görünýär.
Counterpoint-iň uly seljerijisi Jen Parkyň sözlerine görä, eplenýän smartfonlaryň bazary bir segmentden esasy bazara geçende kynçylyklar bilen ýüzbe-ýüz bolýan "geçiş tapgyryna" gadam basdy.
Maglumatlara görä, Samsung 56% paý bilen segmentde öňdebaryjylygyny saklapdy, ýöne mundan bir ýyl öň kompaniýanyň paýy 70% bolupdy. Kompaniýanyň iberişleri 21% pese gaçdy we onuň Galaxy Z Flip6 hem-de Z Fold6 modelleri bolsa satuwlarynyň gowşakdygyny görkezdi. Munuň sebäbi, öňki wersiýalary bilen deňeşdirilende, düýpli gowulaşmalaryň bolmazlygydyr.
Eplenýän enjamlaryň bazaryndaky bäsdeşlik, esasanam, Hytaýda has güýçlendi, Samsung bazaryň bary-ýogy 8 göterimini eýeleýär.
Iýun we iýul aýlarynda flagman modelleriniň çykmagy sebäpli, eplenýän enjamlaryň bazaryndaky iň çalt ösýän brendler HONOR we Motorola boldy. Demirgazyk Amerikada Galaxy Z Flip Moto Razr bilen, Ýewropada bolsa Honor Magic V bilen bäsleşýär.
Huawei Hytaýda Mate X5 we Pocket 2 modelleriniň meşhurlygy sebäpli 15% paýyny saklap, öz ornuny kem-kemden berkidýär. Şol bir wagtyň özünde täze býujet modelleri bolan Nova Flip we Mate XT alyjylaryň ünsüni özüne çekmedi.
Xiaomi, esasanam, Mix Flip-iň ilkinji eplenýän modeli çykandan we Hytaýyň daşyna ilkinji gezek çykarylandan soň, iberişleriň rekord derejede 185% ýokarlandygyny görkezdi.
