TikTok 18 ýaşa çenli ulanyjylar tarapyndan daşky keşbi üýtgetmek üçin filtrleriň ulanylmagyna gadaganlyk girizilýär. Ýetginjekleriň psihiki saglygyny goramaga gönükdirilen bu çäre Dublinde kompaniýanyň ofisinde geçirilen howpsuzlyk forumynda yglan edildi diýip, The Guardian habar berýär.
Gysga wideolary döretmek we görmek üçin platforma kämillik ýaşyna ýetmedik ulanyjylara gözüňi, dodagyňy ulaltmak ýa-da deriniň tonuny deňlemek ýaly ýüz keşbi üýtgedýän filtrleri ulanmagy gadagan etmegi meýilleşdirýär.
Çäklendirme, mysal üçin, ýüzi hakykata has ýakyn üýtgedýän we köp ulanyjylaryň pikiriçe derini “tekizläp”, çekgeleri we gaşy has ýiteldip, gözelligiň hakyky däl ülňülerini görkezýän Bold Glamour filtrini öz içine alar.
Şol bir wagtyň özünde, ýüze towşan gulaklaryny ýa-da itiň burnuny goýýan filtrler elýeterli bolmagynda galar.
Şeýle ädim psihologlaryň we ene-atalaryň arasynda barha güýçlenýän howsalalar bilen baglanyşyklydyr. Filtrleriň hemişe ulanylmagy gözellik ülňüleri barada ýalan düşünjeleri döredip biler, bu hem ýetginjegiň öz-özüne berýän bahasyna ýaramaz täsir edýär. Olaryň käbiri öz hakyky keşbinden nägile bolup başlaýar.
Şeýle-de, TikTok 13 ýaşdan kiçi ulanyjylaryň platforma girmeginiň öňüni almak üçin gorag ulgamyny kämilleşdirer.
