Gresiýadan 80 ýaşly Wasilis Panaýotaropulos Afinada agşamky mekdebe girdi. Pensioner tas 70 ýyl mundan ozal taşlanan okuwyny gutarmak kararyna geldi diýip, The Guardian ýazýar.
“Men ekin meýdanynda kakama kömek etmek üçin [mekdepden] 12 ýaşymda gitdim, ýöne ýüregimde hemişe yzyma dolanmak isleýärdim. Bu isleg meni hiç wagt terk etmedi” – diýip, ol Peloponnesdäki obada geçiren çagalygyny ýatlaýar.
Panaýotaropulos hususy tawernasynyň eýesi bolýança köp ýyllap ofisiant bolup işledi. 80 ýaşyna ýetende okuwyny gutarmak kararyna geldi we bu barada aýalyna aýtdy. Indi ol 15 ýaşly ýetginjekler bilen bir synpda okaýar. Müdir Ewangeliýa Paterakiniň aýtmagyna görä, ol synpda iň yhlasly okuwçy.
“Meniň gowy görýän sapaklarym – gadymy grek dili we matematika. Men kellämde käbir faktlary bulaşdyran ekenim. Mysal üçin, öň men Wizantiýa imperiýasynyň haçan başlanandygyny ýa-da tamamlanandygyny ynamly bilmeýärdim. Jogap almak nähili gowy” – diýip, pensioner gürrüň berdi.
Onuň çözgüdi Gresiýada käbir seslenmelere getirdi. Demograf Pawlos Baltasyň aýtmagyna görä, Panaýotaropulosyň göreldesi ýaş diskriminasiýasy bilen göreşmäge kömek edýär. Ylmy gözlegçileriň pikiriçe, ýurduň ilaty geljekki çärýek asyrda birden azalar, 2050-nji ýyla çenli bolsa Gresiýanyň ilatynyň, takmynan, 35%-i 65 ýaşdan uly bolar.
“Biziňki ýaly jemgyýetlerde ömür dowamlylygy ýokarlanýar, bu hem uly ýaşdaky adamlar üçin ýaşamagyň hiç haçan giç däldigini görkeziji bolup hyzmat edýär” diýip, Baltas belleýär.
