Puertorikoly Denni Mehia Romero “Dünýä jenaby 2024” bäsleşiginiň ýeňijisi boldy. Bäsleşigiň finaly Wýetnamyň Fantýet şäherinde geçirildi. Şu ýyl titul ugrunda dürli ýurtlardan 60 gatnaşyjy bäsleşdi diýip, Vietnam.vn habar berýär.
Titulyň eýesi 27 ýaşly Denni Mehia Romero lukmançylyk ylymlarynyň bakalawry, tansçy we aýdymçydyr. Öň, ol “Jenap Sport” deslapky bäsleşiginde ýeňiş gazandy we finalyň ilkinji 20-ligine awtomatik goşuldy. Ol iňlis, ispan we fransuz dillerinde gürleýär.
Bäsleşikde birinji orny Wýetnamdan Fam Tuan Ngok, ikinji orny Ispaniýadan gatnaşyjy Antonio Kompani, üçünji orny bolsa Angolanyň wekili Felipe Salwador Mariýa eýeledi.
“Dünýä jenaby” bäsleşigi Miss World Organization-yň howandarlygynda 1996-njy ýyldan bäri her iki ýyldan bir gezek geçirilýär. Şu ýyl ol dört ýyllyk arakesmeden soň gaýtadan başlady. 2019-njy ýylda titulyň eýesi angliýaly Jek Heslwud boldy.
