ABŞ-da abraýly Milli kitap baýragynyň ýeňijileri yglan edildi. “Çeper edebiýat” nominasiýasynda baýrak Persiwal Ewerettiň “Jeýms” romanyna berildi. Bu kitap Mark Tweniň nusgawy eserine täzeçe garaýyşdyr diýip, Bi-bi-si habar berýär.
Romanda Tweniň “Geklberri Finniň başdangeçirmelerinden” (Приключения Гекльберри Финна) waka gaçgak gul Jimiň adyndan gürrüň berilýär. Ewerettiň eserinde gul diňe bir öz sesine eýe bolman, eýsem diri galmak üçin zerur bolan maskanyň aňyrsynda hakyky “meni” gizleýän çylşyrymly şahsyýet hökmünde çykyş edýär.
Tankytçylar bu romany amerikan edebiýatyna täzeçe düşünmekde möhüm goşant diýip atlandyrýarlar we hatda eser Mark Tweniň nusgawy eseri bilen deň derejede orun alar diýip çaklaýarlar. “Jeýms” eýýäm birnäçe baýraga eýe boldy we Buker baýragynyň gysga sanawyna goşuldy.
Romanyň sýužeti asyl nusganyň esasy wakalaryny saklaýar, ýöne Jimiň maşgalasy bilen birikmegine aýratyn üns berýär. Kitap gülkini sosial adalatsyzlygyň çuňňur seljermesi bilen utgaşdyrýar.
Mejbury gaçmazyndan öň, Jim çagalara okamagy (gullar üçin gadagan edilen), ýöne şol bir wagtyň özünde sözleri bilkastlaýyn ýoýup we grammatikada ýalňyşlyklara ýol berip, öz sowatlylygyňy gizlemegi, şeýle-de hojaýynlar bilen “dogry” gürleşmegi öwredýär.
Bölümleriň birinde jynsparazlygyň manysyzdygy nygtalýar: Jim gara adama öýkünýän ak adamyň keşbine girmeli bolýar.
