Saud Arabystanynyň paýtagty Er-Riýadda patyşa Salmanyň adyny göterjek stadionyň gurluşygy yglan edildi. 92 000 adamlyk kuwwatly täze desgany 2029-njy ýyla çenli tamamlanmak meýilleşdirilýär.
Onuň dizaýny Las-Wegasdaky “Sfera” taslamasy bilen tanalýan Populous kompaniýasy tarapyndan işlenip düzülýär.
Binagärleriň sözlerine görä, bina çölde şineläp gögerip ugran tohuma meňzär. Diwarlary we petikleri ýaşyl otluk bilen basyrylar. Arena häzirki wagtda gurulýan äpet seýilgäh bilen gurşalar. Sport ýaryşlaryny görmäge gelen tomaşaçylar stadionyň üçegindäki pyýada ýodalarda erkin gezelenç edip bilerler.
VIP myhmanlar üçin goşmaça 2200 ýer göz öňünde tutulan, VVIP tomaşaçylary üçin ýene 300 ýer artdyrylar.
Stadion uly sport toplumynyň bir bölegine öwrüler. Futbol meýdançasyndan başga-da, skalodromlar, olimpiýa basseýni we ýeňil atletikaçylar üçin meýdança bolar.
Stadionyň Saud Arabystanynyň milli futbol ýygyndysynyň öý bazasyna öwrülmegine garaşylýar. Geljekde desgada 2034-nji ýylyň futbol boýunça dünýä çempionatynyň oýunlary geçirilip bilner.
