1996-njy ýylyň 22-nji noýabrynda Katar bilen Türkmenistanyň arasynda diplomatik gatnaşyklar ýola goýuldy. Şondan bäri ýurtlar hyzmatdaşlygyň dürli ugurlaryny öz içine alýan 36-dan gowrak şertnama we Ähtnama gol çekdiler. Bu barada Katar Döwletiniň Türkmenistandaky Adatdan daşary we doly ygtyýarly Ilçisi Hamad bin Raşid AL-AZBA "Neýtralnyý Türkmenistan" gazetinde çap edilen makalada aýtdy.
Diplomat soňky 28 ýylda ýurtlaryň resmi sapar alyşmak we ýokary derejeli çäreleri geçirmek arkaly özara gatnaşyklary ýokarlandyrandygyny aýtdy. Bu döwürde taraplar özara höweslendirmek we goramak, diplomatik hem-de hyzmat pasportlary bolanlar üçin wiza düzgünini ýönekeýleşdirmek, ulag hyzmatdaşlygyny ösdürmek baradaky resminamalary öz içine alýan onlarça şertnama baglaşdy.
Ilçihanalaryň açylmagy bolsa bu ugurda möhüm ädim boldy: 2014-nji ýylda Aşgabatda Kataryň, 2023-nji ýylda bolsa Doha şäherinde Türkmenistanyň içlihanalary açyldy.
Söwda we ykdysady gatnaşyklaryň ösüşini utgaşdyrýan 2011-nji ýylda döredilen hökümetara Katar-Türkmen Komissiýasynyň işini hem aýratyn bellemek möhümdir. Daşary işler ministrlikleriniň arasynda yzygiderli syýasy geňeşmeler geçirilýär, olaryň iň soňkusy 2024-nji ýylda Doha şäherinde geçirildi.
Iki ýurduň hyzmatdaşlygy halkara giňişliginde hem ösýär. Türkmenistan Kataryň 2025–2027-nji ýyllar üçin Ynsan Hukuklary Geňeşine agzalygyna dalaşgärligini goldady, Katar bolsa 2023–2027-nji ýyllar üçin ÝUNESKO-nyň Hökümetara bedenterbiýe we sport komitetine (CIGEPS) agza bolmak üçin Türkmenistanyň dalaşgärligini goldady.
"Iki tarapyň hem ähli ugurlar boýunça hyzmatdaşlygy ösdürmek tagallalary netijesinde biziň ýurtlarymyzyň arasyndaky gatnaşyklaryň çalt giňeljekdigine we ýokarlanjakdygyna çuňňur ynanýarys" diýip, ilçi iki ýurduň arasyndaky diplomatik gatnaşyklaryň ýola goýulmagynyň 28 ýyllygy bilen gutlady.
