Shazam programmasy taryhy görkezijä ýetdi, ol şu wagta çenli aýdymlary 100 mlrd gezek anyklady. Bu waka öz auditoriýasyny giňeltmegi dowam etdirýän hyzmat üçin möhüm pursat diýlip, Apple-iň habarynda aýdylýar.
“Bu möhüm pursat diňe bir adamlaryň Shazam-y ulanmagy näderejede gowy görýändigini däl, eýsem olaryň täze aýdym-saza bolan işdäsini görkezýär” – diýip, kompaniýanyň Apple Music we Beats boýunça prezidenti Oliwer Şusser belledi.
Shazam 2002-nji ýylyň 19-njy awgustynda Beýik Britaniýada işe girizildi. 2017-nji ýylda hyzmat 400 mln dollara Apple kompaniýasy tarapyndan satyn alyndy.
Ösüşiniň dürli tapgyrlarynda programma aýdym-sazy tanamagyň SMS-den başlap, iOS we Android üçin ykjam goşundylara çenli täze usullaryny hödürledi.
Bellenilişi ýaly, ýetilen 100 mlrd görkeziji Ýer ýüzündäki her bir adam üçin 12 aýdym bilen deňdir. “Şeýle görkezijä ýetmek üçin bir adam programmany 3168 ýylyň dowamynda her sekunt ulanmaly” diýlip, habarda aýdylýar.
Bu waka mynasybetli Apple Shazam-da soralýan iň meşhur 100 aýdymdan ybarat pleýlisti döretdi. Sanawda birinji orny 45 mln ýatlama bilen awstraliýaly aýdymçy Tones and I-yň “Dance Monkey” aýdymy eýeledi. Onuň yzyndan Gotye-niň “Somebody That I Used to Know” we Passenger-iň “Let Her Go” aýdymlary, şeýle-de Ed Şiranyň we Maklemoryň meşhur kompozisiýalary gelýär.
Belläp geçsek, soňky döwürde Youtube Music we TikTok ýaly beýleki platformalarda meňzeş funksiýalaryň peýda bolmagy sebäpli aýdym-sazlary tanamak ugrundaky bäsdeşlik güýçlendi.
