Malagada geçirilýän “Dewisiň Kubogy” dünýäniň öňki birinji raketkasy, “Uly tuwulga” ýaryşlarynyň 22 gezek çempiony ispaniýaly tennisçi Rafael Nadal üçin karýerasynda iň soňky ýaryş boldy. Ol ýaryşyň çäklerinde geçen soňky oýnunda niderlandly Botik wan de Zandshýulpdan utuldy. Bu oýundan öň tennisçi karýerasynyň tamamlanmagy mynasybetli Fransiýanyň meşhur L’Équipe gazetiniň baş sahypasynda peýda boldy.
“Iň soňky oýun. Sport karýerasyny tamamlajakdygyny mälim edenden bir aý soň 38 ýaşly Rafael Nadal Malagada soňky ýaryşynda çykyş edýär. Ýekşenbe gününe, final gününe çenli dowam etjek uly tolgunma” – diýlip, gazet sanynda Nadal barada aýdylýar.
Şeýle-de, sport eşiklerini öndüriji kompaniýa Nike Rafael Nadalyň karýerasyna bagyşlanan gologrammany görkezdi. Ol Parižde Eýfel diňiniň ýanynda ýerleşdirildi.
“Üç onýyllykda 1-nji belgili. 4 327 halas edilen breýk-poýnt. Yzygider 912 hepde top-10-da. Toprak kortunda geçirilen oýunlarda yzygiderli 91 ýeňiş. Beýiklik” – diýlip, gologrammanyň kömegi bilen görkezildi.
