Minecraft Ýewropanyň iň uly tematiki seýilgähleriniň operatory Merlin Entertainments bilen şertnama baglaşdy. Şertnamanyň çäklerinde kompaniýa Beýik Britaniýada we ABŞ-da bar bolan attraksionlaryň ornuny tutjak iki sany täze tematiki seýilgähe 110 million dollardan gowrak maýa goýar diýip, The Guardian ýazýar.
Taraplar bilelikdäki taslama “Adventures Made Real” (“Başdangeçirmeler hakykata öwrüldi”) diýip at berdiler. Geljekde beýleki ýurtlara-da ýaýratmak meýilnamalary bar.
Microsoft-yň Game Franchising -niň wise-prezidenti Keýlin Waltersiň belleýşi ýaly, taslama Minecraft brendini oýundan çykaryp, giňeltmäge gönükdirilendir. Kompaniýa Merliniň beden taýdan dynç alşy guramak ugrundaky tejribesinden peýdalanmak isleýär.
Merlin üçin bu şertnama 2005-nji ýylda LEGO bilen baglaşylan şertnamadan bäri iň möhüm şertnamalaryň biri bolup biler. Bu kompaniýa Legoland, Alton Towers, World Peppa Pig World, Sea Life, Madam Týussonyň muzeýi we “Londonyň gözi” ýaly, 23 ýurtda 135-den gowrak attraksion merkezini işledýär.
Minecraft-yň mowzuk seýilgähleriniň 2026-njy we 2027-nji ýyllarda açylmagyna garaşylýar.
Minecraft-yň dünýäde iň geçginli wideo oýundygyny belläliň. Her aý ony 140 million ulanyjy oýnaýar.
Jeýson Momoanyň we Jek Blekiň baş keşbi janlandyrmagynda oýnuň film uýgunlaşmasy 2025-nji ýylyň aprelinde görkeziler. Mundan başga-da, Netflix oýun älemine esaslanýan animasiýa multserialyny yglan etdi.
