"Ertir näme iýmeli?", "Ertir näme geýmeli?"...
Ýaponiýaly Go Kita 23 ýaşyndan bäri ertirligine ramen we hoz, günortanlygyna towuk etini we agşamlygyna ýaşyl noýba bilen gowrulan doňuz etini iýýär. Eýýäm 15 ýyl bäri dowam edip gelýän bu gün tertibini ol her gün karar bermek zerurlygyndan dynmak isländigi bilen düşündirýär. Bu barada South China Morning Post habar berýär.
Kita 15 ýyl mundan ozal täze işe ýerleşýär. Şonda ol işiň we gündelik durmuşyň gereginden artyk çözgüt kabul etmäge mejbur edýändigine düşünýär. Şondan soň ol 7 ýyllap berk gün tertibini berjaý eden beýsbolçy Içiro Suzukiniň göreldesine eýerip başlaýar.
Kita ýetmeýän ýokumly maddalary almak üçin, iýmit goşundylaryny yzygiderli kabul edýär. Şeýle-de, ol birmeňzeş stildäki köýnekleri we balaklary geýýär. Onuň garderobynda birnäçe meňzeş jübüt joraplar we geýimler bar. Ol özüniň gündelik işlerini takyk kesgitlenen tertip boýunça ýerine ýetirýär.
Kita häzirkizaman dünýäsinde maglumatlaryň aşa köp şertlerinde adamyň her gün 35 müňe çenli çözgüt kabul edip bilýändigini, munuň bolsa ýadawlyga getirip bilýändigini belleýär. Şeýle ýagdaý adamyň ýagdaýa oýlanyşykly baha bermek ukybyna täsir edip, prostaksinasiýa (işleriň gijikdirilmegi ýa-da soňa goýulmagy) we irrasional özüni alyp barşyna sebäp bolup biler.
