Volkswagen kompaniýasy Guançžoudaky abraýly awtosalona meşhur modelleriniň täzelenen wersiýalaryndan başga-da, birnäçe düýbünden täze awtomobilini getirdi. Olaryň hatarynda Viloran, Tayron L, Tavendor, Talagon, Magotan, şeýle-de konseptual ID.Code we doly elektrik ID.4 X, ID.BUZZ, ID.Unix bar.
Volkswagen Viloran – bu MQB platformasynda döredilen ýedi orunlyk miniwen bolup, 186 we 220 at güýjüni berýän 2,0 litrlik turbo hereketlendirijisi bilen enjamlaşdyryldy. Ol öňdäki herekete getirijä we 7 basgançakly “robota” eýe boldy.
Täze Volkswagen Tayron L krossoweri Tiguan-yň ornuny eýeläp, bäş ýa-da ýedi orunlyk konfigurasiýada hödürlenýär. Kuzowyň uzynlygy 4684 mm. Esasy wersiýa 1,5 litrlik EA211 hereketlendirijisi (160 at güýji) bilen üpjün edildi. Şeýle-de, 2,0 litrlik EA888 enjamy (220 at güýji) elýeterli.
Tavendor modeli Teramont X-e alternatiwa hökmünde kesgitlenýär. Onuň uzynlygy 4936 mm, hereketlendirijileriň kuwwaty – 186 ýa-da 220 at güýji.
Talagon kuzowyň 5152 mm uzynlygy bilen kompaniýanyň iň uly krossoweri boldy. Model üçin üç benzin hereketlendirijisi, şol sanda 299 at güýjüni berýän V6 elýeterli.
Magotan ýewropa Passat-yna esaslanýar. Uzynlygy 4990 mm bolan awtomobil 1,5 ýa-da 2,0 litrlik turbo hereketlendirijileri, öňdäki herekete getiriji we 7 basgançakly DSG gutusy bilen üpjün edildi.
ID.4 X elektrik krossoweri 550 km çenli menzili we 313 at güýjüne çenli kuwwaty hödürleýär.
ID.Code – dördünji derejeli awtonom dolandyryş goldawyna eýe bolup, awtomobile bellibir şertlerde sürüji gatnaşmazdan hereket etmäge mümkinçilik berýän konsept-kar.
ID.BUZZ – 7 ýolagça niýetlenýän elektrik miniweni. Geçýän menzili – 400 km çenli. Elektromotoryň kuwwaty 204 at güýjüne barabar, akkumulýator – 77 kWt/sag. Iň ýokary tizlik – 145 km/sag.
Ykjam ID.Unix kupe-krossoweri – täze ID.UX seriýasynyň ilkinji modeli. Volkswagen Anhui bilelikdäki kärhanasy tarapyndan işlenip taýýarlandy. Göwrümi 4663x1860x1610 mm, tigir bazasy 2766 mm. Yzky herekete getiriji bilen bir motorly wersiýa 170 kWt kuwwatly (231 at güýji) elektrik hereketlendirijisine eýe boldy. Doly herekete getiriji bilen iki motorly wersiýa 80 kWt (109 at güýji) öňdäki, 170 kWt (231 at güýji) yzky elektrik hereketlendirijisini aldy, umumy kuwwat – 250 kWt (340 at güýji). Bir motorly wersiýa üçin geçýän menzili 621 km, iki motorly üçin 565 km barabar.
