Gadymy Adrianopolis şäherinde (Türkiye) geçirilen gazuw-agtaryş işleri wagtynda arheologlar V asyra degişli tumar tapdylar. Artefaktyň ýüzünde Süleýman pygamberiň şeýtany naýza bilen parçalaýan pursady şekillendirilýär diýip, Arkeonews ýazýar.
Tumar Wizantiýanyň irki döwründe ýasalypdyr. Onuň bir tarapynda: "Rebbimiz ýamanlygy ýeňdi" diýen ýazgy bar. Beýleki tarapynda Ezraýyl, Jebraýyl, Mikail we Israfil ýaly perişdeleriň atlary bar.
Barlaglaryň ýolbaşçysy, dosent Ersin Çelikbaş tapyndylaryň sebit üçin özboluşlydygyny aýtdy. Bu dünýäde tapylan şeýle tumarlaryň ikinjisidir, birinjisi Ierusalimden tapyldy. Kulonda şekillendirilen Süleýman üç esasy monoteist dinleriň hemmesinde hormatlanýar. Iudaizmde we hristiançylykda ol patyşa we akyldar, yslamda bolsa pygamber we hökümdar hasaplanýar.
Tumaryň döredilen senesi ýazgylar we stratigrafiki derňewler esasynda kesgitlendi. Arheologlar şeýle tapyndylaryň Anadolynyň dini we medeni taryhy baradaky bilimleri ep-esli giňeldip biljekdigini nygtaýarlar. Hususan-da, taryhçylar bu tapyndynyň giçki halkolit döwrüniň iri ilatly ýeri bolan Adrianopolisiň harby taryhy, Rim hökümdarlygy we Wizantiýanyň irki döwri bilen baglanyşyklydygyny bellediler. Ozal bu ýerde Rim we Wizantiýa atlylarynyň bardygyny görkezýän subutnamalar tapyldy. Süleýman pygamber goşun serkerdesi bolup, goragçy hökmünde hormat goýlupdyr. Megerem, onuň keşbiniň harby maksatlar üçin ulanylmagy şu sebäpli bolsa gerek.
