Uttar-Pradeş ştatyndan (Hindistan) öňki mugallym, 65 ýaşly Nişa Madhulika Hindistanyň iň baý ýutuber zenany boldy. The Economic Times neşiri onuň baýlygynyň 430 million rupiýa (takmynan 5 million dollar) bolandygyny çaklaýar.
Madhulika 2007-nji ýylda aşpezlik boýunça blog ýöredip başlady. Ol, çagalary gidensoň, ýalňyzlygyny şeýdip ýeňip geçmek isledi. Hindi dilinde hindi aşhanasynyň wegetarian tagamlarynyň taýýarlanyş usuly barada gürrüň berdi.
“Men ýeke galanymdan soň, nahar bişirmekden teselli tapdym. Bu hobbi meniň durmuşymy üýtgetdi" – diýip, bloger gürrüň berýär. Onuň ýönekeý, ädimme-ädim düşündirýän tagam taýýarlaýyş usullary tiz meşhurlyk gazandy.
2011-nji ýylda Madhulika öz blogynda ýüzden gowrak resept toplap, YouTube-da aşpezlik kanalyny açdy we ähli ünsüni şoňa jemledi. Şonuň hatyrasyna mugallymçylyk işini hem taşlady.
2017-nji ýylda platformadaky iň oňat aşpezlik mazmuny üçin baýrak aldy we täze dörän awtorlary goldaýan YouTube #SeeSomethingNew kampaniýasynyň ýüzi boldy.
Häzirki wagtda Madhulikanyň YouTube-da 14,5 million abunaçysy we Facebook -da bolsa 5,6 million abunaçysy bar. The Economic Times neşiri ony “Hindistanyň YouTube-daky ýyldyzlarynyň ilkinji onlugyna” goşdy.
Ulanyjylar abunaçylaryna bolan mähirli garaýşy üçin, köplenç, oňa “eje” diýip ýüzlenýärler. Madhulika uly meşhurlyga eýedigine garamazdan, her teswire hut özi jogap bermäge synanyşýar.
Aşpezlikden başga-da, ol Hindistanyň obalarynda internetiň elýeterli bolmagyny üpjün etmeklige gönükdirilen Tata Trusts' Project Druv taslamasyna goldaw bermek bilen, haýyr-sahawat işine hem gatnaşýar.
