Oktýabr aýynda birikdirilýän gibrid we doly elektrik awtomobilleriň global satuwy geçen ýylyň degişli döwri bilen deňeşdirilende 35% ýokarlandy. Ösüşe iň uly goşant goşan Hytaý bolup, bu ýerde şeýle modelleriň satuwy 54% ýokarlandy diýip, Rho Motion gözleg kompaniýasy habar berdi.
Ýewropada satuw 0,8% ýokarlandy, bu ýyllyk aňlatmasynda ösüşiň ikinji aýydyr.
“Biz sebitde ýylyň üstünlikli tamamlanmagyna garaşýarys” – diýip, maglumatlar boýunça menejer Çarlz Lester Reuters agentligine aýtdy.
Kompaniýanyň maglumatlaryna görä, oktýabr aýynda dünýäde 1,72 mln elektromobil we gibrid satyldy. Hytaý 1,2 mln awtomobil möçberinde rekord satuwa ýetdi. ABŞ-da we Kanadada bu görkeziji 11,4%, 0,16 mln birlige çenli ýokarlandy, Ýewropada satuw 0,26 mln boldy – bu geçen ýylyň oktýabr aýy bilen deňeşdirilende köpdür, ýöne sentýabr aýyndan 14% azdyr.
“Hytaýyň elektromobil we gibrid bazary ýylyň soňky iki aýynda ýokary satuw görkezijileri bilen peselmegiň alamatlaryny görkezmeýär” – diýlip, Rho Motion-yň beýanynda aýdylýar.
Şeýle-de, kompaniýa ÝB-niň geljek ýyl üçin kesgitlenen uglerod zyňyndylaryny azaltmak boýunça maksatlarynyň elektromobilleriň bahasynyň arzanlamagyna getirip biljekdigini, sebäbi öndürijileriň ekologik talaplary berjaý etmek we jerimelerden gaçmak üçin olaryň satuwyny ýokarlandyrmaga çalyşýandygyny belledi.
Şol bir wagtyň özünde, Ýewropadaky awtoöndürijiler ýokary önümçilik çykdajylary, elektromobillere geçmek zerurlygy we arzan modelleri hödürleýän hytaý öndürijileri tarapyndan bäsdeşligiň güýçlenmegi bilen baglanyşykly kynçylyklar bilen ýüzbe-ýüz bolýarlar. Mysal üçin, öň Volkswagen-iň Germaniýada azyndan üç zawody ýapmakçydygy habar berildi.
