Apple iPhone 16 we 16 Pro smartfonlaryny özbaşdak bejermek üçin ätiýaçlyk şaýlaryny satyp başlady. Indi ulanyjylar enjamlaryny ussa gitmezden özbaşdak bejermek üçin kameralar, displeýler we batareýalar ýaly komponentleri satyn alyp bilerler diýip, The Verge habar berýär.
Çeşmäniň habar bermegine görä, täze önümleriň arasynda iPhone 16 üçin 169 dollarlyk, iPhone 16 Pro üçin bolsa 249 dollarlyk kamera modullary bar. Displeýleriň bahasy modeline baglylykda 279 dollardan 379 dollara çenli, esasy wersiýalary we Pro modelleri üçin akkumulýatorlar, degişlilikde, 99 we 119 dollar bolar.
Şeýle hem Apple enjamy bejermekde gerek bolan gurallary bolmadyk ulanyjylar üçin 49 dollara ýörite abatlaýyş toplumyny kärendesine hödürleýär.
Apple-iň abatlaýyş işini has az töwekgelçilikli we has elýeterli edendigini belläp geçmelidiris. Kompaniýanyň sentýabr aýynda neşir edilen gollanmasynyň kömegi bilen ulanyjylar ädimme-ädim görkezmeleri aňsatlyk bilen ýerine ýetirip, abatlaýyş çykdajylaryny tygşytlap bilerler. Geljekde batareýalaryň we displeýleriň has elýeterli görnüşleriniň üçünji tarap öndürijileri tarapyndan öndürilmegine garaşylýar. Şu ýyl Apple olaryň goldawyny gowulandyrmagy meýilleşdirýär.
