Italiýanyň Geox brendi Animaccord animasiýa studiýasy bilen hyzmatdaşlykda döredilen Geox & Masha and the Bear harytlar hatarynyň toplumyny çykardy. Buro 24/7-niň habar bermegine görä, toplumda snoubutlar, ýyly krossowkalar, dabany rifli beýik aýakgaplar, dabany ýagty saçýan snikerler we çagalar üçin üstki eşikler bar.
Her bir model “Maşa we Aýy” multfilmindäki gahrymanlaryň şekilleri we täsin emoji çaplary bilen tapawutlanýar. Illuminus krossowkalarynda LED-li daban bar we degişlilikde gyzlar we oglanlar üçin gülgüne hem-de ýaşyl reňklerde bolýar.
Geox-iň dizaýnerleri aýakgap bilen stil taýdan utgaşýan, ýaz-güýz möwsümleri üçin niýetlenen kurtkalary hem goşdular. Junette we Theleven modelleri kolorblok stilinde ýerine ýetirilen we gelişýän reňkli görnüşleri hödürleýär. Şeýle hem, islendik howada goragy üpjün edýän ýyly krossowkalar we suw geçirmeýän Amphibiox ™ tehnologiýaly bagjykly aýakgaplar hödürlendi.
Geox kompaniýasy 1995-nji ýylda Italiýada esaslandyryldy. Brendiň ady grek sözi Geo (ýer) we häzirki zaman tehnologiýasyny alamatlandyrýan “X” harpynyň utgaşmasyndan gelip çykýar. Geox howa geçirýän, ýöne suw geçirmeýän birleşdirilen materiallary öndürmek pudagynda 60 töweregi patente eýe. Alymlaryň adamyň derlemek we ýylylyk bölüp çykaryjylyk aýratynlyklaryny öwrenýän öz gözleg merkezinden başga-da, Geox täze tehnologiýalary işläp taýýarlamak we synagdan geçirmek üçin birnäçe iri uniwersitetler hem-de barlaghanalar bilen hyzmatdaşlyk edýär.
