Dünýäde iň uly Binance kriptobiržasynda bitkoiniň bahasy taryhda ilkinji gezek 90 müň dollardan geçdi. Täze rekord 93 434 dollar boldy. Esasy kriptowalýuta bu görkezijä çarşenbe güni ýetdi, şondan soň birneme peseldi. 14-nji noýabrda Aşgabat wagty bilen 12:12-ä çenli ýagdaýa görä, ol 89 557 dollar derejesinde satylýar.
Iki günüň içinde esasy kriptowalýutanyň bahasy 10 müň dollardan gowrak ýokarlandy. Baha 11-nji noýabrda amerikan bazary açylanda 80 müň dollardan birbada ýokarlanyp başlady we birnäçe sagadyň içinde 10% ýokarlanyp, iň ýokary derejesini yzygiderli täzeledi. Bir hepdede bitkoin 20% gymmatlady.
BTC-niň kapitalizasiýasy iň ýokary derejesinde 1,82 trln dollara ýetdi. Iň uly aktiwleriň reýtinginde bitkoin kümüşden öňe geçdi we hatda dünýäde iň uly nebit kompaniýasy Saudi Aramco-ny hem yzda galdyrdy. Onuň bazar bahasy 1,79 trln dollara barabar.
Bitkoiniň bahasynyň ösüşi sişenbe güni ABŞ-nyň makro maglumatlarynyň neşir edilmegi bilen başlandy. ABŞ-da oktýabr aýynda inflýasiýanyň ösüş depgini 0,2% ýokarlanyp, ýyllyk hasabynda 2,6% derejesine ýetdi we bu bazar çaklamalaryna doly gabat gelýär.
Kriptowalýutalaryň ösüşi Donald Trampyň ABŞ-nyň Prezident saýlawlarynda ýeňiş gazanany bäri dowam edýär. Saýlawdan öňki çykyşlarynda syýasatçy kripto-işewürligini goldajakdygyna ençeme gezek wada berip, kripto-pudagyna we amerikan maýning kompaniýalaryna goldaw berjekdigini açyk belledi.
