Hyundai Motor kompaniýasy we Ulsan şäheriniň häkimiýeti şäherde wodorod ekoulgamyny döretmek maksady bilen özara düşünişmek hakynda ähtnama gol çekdiler. Şertnamanyň maksady wodorody öndürmek, saklamak, daşamak we ulanmak üçin infrastrukturany ösdürmekden ybarat.
Resminama gol çekmek dabarasy Hyundai Motor kompaniýasynyň baş müdiri Li Don Sokuň we Ulsanyň häkimi Kim Du Gýomyň gatnaşmagynda geçirildi.
Taraplar arassa wodorod önümçiligi, şol sanda suw elektrolizi ugurlarynda hem-de wodorod ulaglaryny işläp taýýarlamakda hyzmatdaşlyk etmek barada ylalaşdylar. Hususan-da, Hyundai Motor ýük gatnawlary üçin wodorod tirkeg çekijilerini işläp taýýarlamagy meýilleşdirýär, bu bolsa ekologiýa taýdan arassa logistika ulgamyny döretmäge mümkinçilik berer.
Taslama wodorod traktorlarynyň we ýük ýükleýjileriň döredilmegini, şeýle-de sebitiň dürli logistika ugurlarynda wodorod awtomobillerini synagdan geçirmegi öz içine alýar. Hyzmatdaşlar wodorod ekoulgamyny ösdürmegi maksat edinýärler, bu daşky gurşawa ýetýän täsiri azaltmaga we energiýa netijeliligini ýokarlandyrmaga tarap ädim bolmaly.
Taslama sebitde wodorod tehnologiýalaryny ösdürmäge we Ulsanyň Günorta Koreýada wodorod infrastrukturasynyň merkezi hökmünde ornuny berkitmäge gönükdirilendir.
