Google kompaniýasy Android üçin emeli aňly ses kömekçisine gelýän jaňlara jogap berip, söhbetdeş bilen doly derejeli gürleşmäge mümkinçilik berýän täze funksiýany işläp taýýarlaýar. Bu barada programmanyň koduna salgylanyp, 9to5Google portaly habar berýär.
Call Screen diýlip atlandyrylýan bu funksiýa indi diňe bir öňünden taýýarlanyp goýlan jogaplary ulanmak bilen çäklenmän, eýsem maglumatlary ýokary takyklyk bilen kesgitläp, hakyky wagtda jogap döredip biler. Öňki wersiýalardan tapawutlylykda, täze kömekçi gürrüňdeşligiň dowamynda zerur bolan ýagdaýynda aýdyňlaşdyryjy soraglara jogap berip, has giňişleýin maglumat berip biler.
Ses kömekçisi Dobby kod adyny aldy, onuň işine bolsa Gemini Nano neýroulgamy jogap berer. Kömekçi multi-turn conversational AI tehnologiýasynyň kömegi bilen gürrüňiň mazmunyna “düşünip” biler, bu hem aragatnaşygy has tebigy eder.
Call Screen funksiýasy ilkinji gezek 2021-nji ýylda Android 12-ä girizildi. 2023-nji ýylyň ahyrynda Google gysgaça kontekst jogaplaryny goşup, ony kämilleşdirdi, 2024-nji ýylyň mart aýynda bolsa, ulanyjy gelýän jaňa jogap bermese-de, awtomatik jogaplar peýda boldy.
