Bitkoin kriptowalýutasynyň bahasy ýene-de taryhy iň ýokary derejäni täzeledi. 10-njy noýabrda gündiz kriptowalýuta 80 müň dollar görkezijisine ýetdi diýip, Binance kriptobiržasy habar berýär.
Taryhy derejeden geçenden soň tiz wagtdan bitkoiniň bahasy birneme peseldi, ýöne soň ýene-de ýokarlanmagyny dowam etdirdi. 10-njy noýabrda Aşgabat wagty bilen 23:23-e çenli ýagdaýa görä, kriptowalýuta 80,729 dollar derejesinde satylýar. Şeýle maglumatlary Coinmarketcap hem hödürleýär.
Bitkoin ABŞ-nyň Prezident saýlawlarynyň geçýän döwründe we kriptowalýutany goldaýan Donald Trampyň ýeňşine garaşylýan wagty işjeň gymmatlap başlady. ABŞ-da sesleriň sanalan gijesi bitkoiniň bahasy ilkinji gezek 75 müň dollardan geçdi.
Şu gün Respublikan partiýasyndan dalaşgäriň ähli “durnuksyz” ştatlarda ýeňiş gazanandygy belli boldy. Amerikanyň iň iri KHBS-iniň (The New York Times, CNN, Associated Press) hasaplamalaryna görä, Tramp ýeňiş üçin zerur bolan 270 sesden ýurt boýunça saýlaw wekilleriniň 312 sesini aldy. Ol bary-ýogy 226 ses alan garşydaşy Kamala Harrisden aratapawudyny has artdyrdy.
