Ýaponiýaly analitikler Google Pixel 9 Pro we Apple iPhone 16 Pro üçin zerur bolan düzüm bölekleriniň bahasyny hasapladylar. Smartfonlaryň ikisi-de bazarda 999 dollar baha bilen hödürlenýär diýip, GSMArena ýazýar.
Hasaplamalara görä, Pixel 9 Pro üçin material çykdajylary 406 dollara barabar, şol bir wagtyň özünde iPhone 16 Pro-nyň önümçiligine 568 dollar sarp edilýär.
Belläp geçsek, komponentlere baha berlende (BOM, Bill of Materials) diňe detallar üçin esasy çykdajylar göz öňünde tutulýar we ylmy gözlegler, işläp taýýarlamalar, marketing üçin çykdajylar üns merkezine alynmaýar, bu hem maglumatlary takmynlyga getirýär.
Apple öz gurluşlaryny öndürmekde ýokary tehnologik we gymmat komponentlere bil baglaýar. Mysal üçin, iPhone 16 Pro-nyň çipseti 135 dollara, displeý 110 dollara, kameralar 91 dollara barabar. Pixel 9 Pro üçin bu çykdajylar pesdir: çipset üçin 80 dollar, displeý üçin 75 dollar we kameralar üçin 61 dollar. Önümçilik çykdajylaryndaky tapawut tehnologiýalaryň görnüşine we satyn alyş möçberine baglydyr.
Smartfon bahalarynyň deň bolmagy bilen, Apple premium materiallara we öňdebaryjy tehnologiýalara ünsi jemleýär, Google bolsa müşderileri elýeterliligi we baha hem hil gatnaşygy taýdan özüne çekýär. Bu çözgüt hem iki tehnologiýa ägirdiniň iş strategiýalarynyň dürlüdigini görkezýär.
