7-nji noýabrda Ýaponiýanyň meşhur Fudzi dagynda möwsümiň ilkinji gar örtügi peýda boldy. Bu 130 ýyllyk taryhyň dowamynda iň giçki ilkinji gar diýip, BBC habar berýär. Adatça, 3 776 metrlik dagyň depesi oktýabr aýynyň başyna gar bilen örtülýär.
Her ýyl Fudzi dagynda bolup geçýän üýtgeşmelere gözegçilik edýän Kofu Meteorologiýa Obserwatoriýasy 7-nji noýabrda ýerli wagt bilen sagat 6:15-de Ýaponiýanyň iň beýik depesinde garyň bardygyny resmi taýdan tassyklady. Synçylar ilkibaşda bulutlar sebäpli gar örtügini görüp bilmediler, ýöne howanyň durlanmagy bilen depede ýuka gar gatlagynyň bardygy görnüp ugrady.
Kyodo News -yň habaryna görä, şu ýyl ilkinji garyň ýagan senesi 1955-nji 26-njy oktýabryndaky we 2016-njy ýylyň öňki rekordyny täzeledi hem-de 1894-nji ýyldan ýöredilip başlanan ýazgylaryň içinde iň giçkisi boldy.
Ilkinji garyň şeýle giç peýda bolmagy sebitde adaty bolmadyk maýyl güýz bilen baglanyşykly: oktýabr aýynda Fudzi dagynyň gerşinde ortaça temperatura 1,6°C, bu ýylyň şu pasly üçin köp ýyllyk kadadan 3,6° C ýokary; Ýaponiýanyň Meteorologiýa guramasynyň habaryna görä, geçen tomus soňky 126 ýylda iň yssy tomus boldy, iýun-awgust aýlary aralygyndaky ortaça temperatura adaty kadadan 1,76° C ýokary boldy.
Fudzi dagy stratowulkandyr. Ol Tokionyň 90 km günorta-günbataryndaky Honsýu adasynda, wulkanyň köp ýyllyk işjeň sebitinde, gadymy wulkanlaryň üstünde ýerleşýär. Häzirki wagtda wulkan gowşak işjeň hasaplanýar, wulkan iň soňky gezek 1707-1708-nji ýyllarda atylypdyr.
