“Barselonanyň” hüjümçi ýarymgoragçysy Rafinýa 17 ýaşly Lamin Ýamala “Kopa baýragyny” (2023/2024 möwsüminiň jemi boýunça 21 ýaşa çenli iň gowy futbolça berilýän baýrak) alandan soň täze altyn iPhone sowgat etdi.
Sosial ulgamlardaky wideosynda Ýamal täze gajetiň korpusynyň merkezinde 19-lyk belginiň we Lamine Yamal ýazgysynyň ýazylandygyny, burçda bolsa “Barselonanyň” logotipiniň ýerleşdirilendigini görkezdi.
Telefon futbol ýyldyzlary üçin lýuks aksessuarlary taýýarlamak bilen belli bolan “I Design Gold” kompaniýasy arkaly sargyt esasynda döredildi. Lionel Messi hem 2022-nji ýylyň dünýä çempionatyndaky ýeňişden soň Argentinanyň milli ýygyndysyna şeýle sowgat beripdi.
Ýatlap geçsek, Ýamal 2023-nji ýylyň iýul aýynda “Barselonanyň” düzümine goşuldy. Ýakynda geçirilen 2023/2024 möwsüminiň jemi boýunça “Altyn top” baýragynyň gowşurylyş dabarasynda ol bu baýrak üçin ses berişlikde sekizinji orny eýeledi. Ýamal “Altyn top” baýragynyň ilkinji onlugyna giren iň ýaş oýunçy boldy.
