54 ýaşly hukukçy Duma Boko Botswananyň täze we hasap boýunça altynjy Prezidenti boldy. Bu barada milli telewideniýe arkaly respublikanyň baş kazysy Terrens Rannowane yglan etdi diýip, ýerli habarlar portaly Daily news habar berýär.
Boko ýurtda geçirilen parlament saýlawlarynda ýeňiş gazanan “Demokratik özgertmeleriň goragynda” (DÖG) oppozisiýa koalisiýasynyň lideridir.
DÖG Milli assambleýada (bir palataly parlament) eýýäm 35 deputatlyk mandatyny aldy, bu hem oňa artykmaçlyk berýär. Sesleri sanamak dowam etdirilýär. Soňky 58 ýyl häkimiýet başynda bolan Botswananyň Demokratik partiýasy (BDP) häzirlikçe 4 mandat aldy.
Botswananyň häzirki Prezidenti we BDP-niň lideri Mokgwitsi Masisi öz partiýasynyň ýeňlendigini boýun alyp, Boko eýýäm ýeňşi bilen gutlamak üçin jaň edendigini habar berdi. Masisi wezipeden çekilýändigini aýtdy.
Botswananyň Prezidenti parlamentiň deputatlarynyň sesleriniň köplügi bilen saýlanýar. 30-njy oktýabrda geçirilen kanun çykaryjy edaranyň saýlawlaryna alty partiýa gatnaşdy. Şolardan dördüsi Prezident wezipesine öz dalaşgärlerini hödürledi. Masisi döwlet Baştutany wezipesinde ikinji möhlete gaýtadan saýlanmak isledi.
