Apple kompaniýasy M4 prosessory we Apple Intelligence emeli aň ulgamy bilen üpjün edilen täze iMac kompýuterini anons etdi. Retina 4.5K displeýli 24 dýuýmlyk monoblok has inçeldi we ýedi reňkde: ýaşyl, sary, mämişi, gülgüne, benewşe, gök we kümüşsöw reňklerinde täzelenen dizaýna eýe boldy.
Kompaniýa M1 esasly geçenki iMac bilen deňeşdirilende, M4 prosessorynyň öndürijiligi gündelik işlerde 1,7 esse we suratlary gaýtadan işlemek hem oýun ýaly programmalarda 2,1 esse ýokarlandyrýandygyny nygtaýar. Neural Engine bolsa emeli aňyň ulanylmagy bilen ýerine ýetirilýän işlerde öndürijiligiň üç esse ýokarlanmagyny üpjün edýär.
Gajet 12 Mp Center Stage kamerasy bilen üpjün edildi. Desk View funksiýaly kamera şol bir wagtyň özünde ulanyjyny we onuň iş ýerini görkezip bilýär. Şeýle-de, kompýuter üç studiýa mikrofony we alty dinamika bilen üpjün edildi, bu hem sesi has kämilleşdirmäge mümkinçilik berdi. Dört USB Type-C portunyň ählisi maglumatlary çalt geçirmek we daşarky displeýleri birikdirmek üçin Thunderbolt 4-i goldaýar.
Şeýle-de, Magic Keyboard klawiaturasy, Magic Mouse syçanjygy we Magic Trackpad trekpady indi USB Type-C arkaly birikdirilýär we iMac-a laýyk reňklerde elýeterlidir. Täze iMac sargyt etmek üçin 1299 dollar bahadan eýýäm elýeterli. Satuw 8-nji noýabrda başlar. Esasy konfigurasiýa sekiz ýadroly prosessory, 16 GB operatiw ýady we 256 GB SSD-ni öz içine alýar. 1499 dollara 10 ýadroly prosessor, 16 GB operatiw ýat we 256 GB SSD bolan wersiýany satyn alyp bolýar.
