Owganystanda ýaşaýan türkmenleriň Magtymguly Pyragy adyndaky medeni jemgyýetiniň adybir futzal topary ýurdumyzda myhmançylykda boldy. Olar Türkmenistanyň Köpetdag, Senagat bank hem-de Mary welaýatynyň futzal ýygyndy toparlary bilen ýoldaşlyk duşuşygyny geçirdiler.
Ilkinji ýoldaşlyk oýny 25-nji oktýabrda Ak bugdaý etrabynyň sport mekdebinde guraldy. Onda owganystanly türkmenler ýurdumyzyň Köpetdag futzal topary bilen duşuşyp, çekeleşikli oýun görkezdiler. Netijede, Köpetdag futzal topary ýeňiş gazanyp, oýun 10:6 hasap bilen jemlendi. Oýun tamamlanandan soň, Köpetdag hem-de Magtymguly Pyragy futzal toparynyň oýunçylary bilelikde ýadygärlik surata düşdüler.
26-njy oktýabrda bolsa bu sport mekdepde Türkmenistanyň Senagat bank futzal topary bilen owganystanly türkmenleriň myhmançylykda bolýan futzal toparynyň arasynda ýoldaşlyk duşuşygy guraldy. Bu duşuşyk deň netije, ýagny 2:2 hasaby bilen tamamlandy. Duşuşygyň ahyrynda Magtymguly Pyragy futzal toparyna we onuň ýolbaşçysyna Türkmenistanyň bedenterbiýe we sport baradaky Döwlet komitetiniň ýadygärlik sowgatlary gowşuryldy.
Soňra myhmanlar Mary welaýatyň birnäçe taryhy ýadygärliklerine gezelenç etdiler.
29-njy oktýabrda bolsa owganystanly türkmenleriň futzal topary Mary welaýatynyň futzal ýygyndy topary bilen üstünlikli ýoldaşlyk duşuşygyny geçirdiler. Bu duşuşyk Mary welaýat sport komitetiniň 1-nji sport mekdebinde guraldy. Netijeli geçen duşuşykda Magtymguly Pyragy futzal topary 3:2 hasaby bilen ýeňiş gazandy.
