Malmödäki konsertde inžener Fredrik Gran tarapyndan döredilen wiolonçel çalýan robotyň dünýäde ilkinji çykyşy boldy. Simfonik orkestr bilen bilelikdäki çykyşyň çäklerinde robot şwesiýaly kompozitor Ýakob Mýulrad tarapyndan ýörite ýazylan sazy ýerine ýetirdi diýip, Interesting Engineering habar berýär.
Adaty emeli aň gurallaryndan tapawutlylykda, robot sazy improwizirlenen algoritmlere görä däl-de, ýazylan partitura görä ýerine ýetirdi we munuň üçin 3D çap edilen iki eli ulandy.
“Men orkestri hemişe bir bitewi janly organizm hökmünde göz öňüne getirýärdim we maňa onuň wiolonçel çalýan robota nähili täsir etjekdigi gyzykly boldy. Bu tejribe ynsana we robota mahsus elementleri birleşdirýän özboluşly bitewiligi döretdi” diýip, eseriň awtory belledi.
Mundan başga-da, Mýulradyň aýtmagyna görä, taslamanyň çylşyrymlylygy robotyň awtomatlaşdyrylan ýerine ýetiriş üçin iň kyn bolan kirişli gurallary özleşdirmegi boldy. Pianinodan tapawutlylykda, wiolonçel ýokary derejede takyk sazlaşygy talap edýär diýip, Mýulrad belleýär.
Şeýle-de, bu taslama ýene bir gyzykly paradoksal ideýany öz içine alýar: “Robot, göräýmäge, tehniki taýdan takyk, ýöne ol duýgulary bermäge ukyply. Men emosional derejede duýulýan sazy ýazmak kararyna geldim, onuň robot tarapyndan ýerine ýetirilmegi bolsa tutuş pikire aýratyn öwüşgin berýär” – diýip, kompozitor belledi.
Bu tejribe konserti bilen awtorlar robotlaşdyrylan gurallaryň aýdym-saz ýerine ýetirişini baýlaşdyryp, döredijilik mümkinçiliklerini giňeldip, auditoriýa bilen emosional aragatnaşygy saklap biljekdigini görkezmek islediler.
