ABŞ-nyň Kaliforniýa ştatynyň San-Hose şäherinden 36 ýaşly höwesjeň matematik Lýuk Dýurant 41 024 320 sifrden ybarat bolan iň uly ýönekeý sany açdy. Bu Mersenniň 52-nji ýönekeý sany we ol öňki rekorddan 16 million sifr artykdyr. Bu barada Great Internet Mersenne Prime Search (GIMPS) taslamasynyň saýtynda habar berilýär.
Lýuk Dýurant NVIDIA-nyň öňki işgäri we ýönekeý sanlary gözlemek bilen meşgullanýan GIMPS taslamasyna işjeň gatnaşyjydyr. Täze san M136279841 adyny aldy. Ony almak üçin 2-ni 136 279 841 derejesine götermeli, soňra biri aýyrmaly. Öz açyşy üçin Dýurant 3 müň dollar möçberde baýrak alar.
Ýeri gelende ýatlap geçsek, ýönekeý sanlar diýlip, diňe bire we özüne bölünýän sanlara aýdylýar. Mysal üçin, 2, 3, 5 we 7 ýönekeý sanlardyr. Mersenniň ýönekeý sanlary olary 350 ýyldan gowrak wagt ozal öwrenen fransiýaly monah Maren Mersenniň hormatyna atlandyryldy.
Dýurant gözlege 2023-nji ýylyň oktýabr aýynda başlady. Munuň üçin ol 17 ýurtdaky 24 maglumat merkezi boýunça paýlanan müňlerçe grafiki prosessorly serwerleri ulandy. Onuň bulut superkompýuteri maglumatlary tas bir ýyl işledi. 2024-nji ýylyň 11-nji oktýabrynda Dublindäki NVIDIA A100 prosessory M136279841 sanynyň ýönekeý bolmak ähtimallygyny hasaba aldy. Ertesi gün San-Antoniodaky NVIDIA H100 prosessory muny ýörite Lukas-Lemer barlagy arkaly tassyklady.
Iň uly ýönekeý sanlary gözlemäge islendik adam gatnaşyp biler. Munuň üçin ýörite Prime95 programmasyny ýükläp almaly.
Mundan öň belli bolan iň uly ýönekeý san 2018-nji ýylda işläp düzüji Patrik Lýaroş tarapyndan açylan M82589933 hasaplanýardy.
