Dubaýda örän insiz diň – Muraba Veil gurlar. Onuň ini bary-ýogy 22,5 metr bolup, Muraba kompaniýasyndan jaý gurujylaryň pikiriçe, taslama dünýäniň ähli ýerinden maýadarlary we syýahatçylary özüne çeker.
Özboluşly binagärlik desgasynyň taslamalaşdyrylmagy bilen belli ispan firmasy RCR Arquitectes meşgullanýar. Bina 73 gatdan ybarat bolup, onuň beýikligi 380 metr bolar. Binada 131 otag, şeýle-de sagaldyş spa-merkezi, restoran, galereýa, padel-tennis korty we kinoteatr ýerleşdiriler.
Otaglaryň bahasy 18 mln dirhamdan (takmynan, 4,9 mln dollar) başlar. Her bir rezidensiýa gatyň tutuş inini eýelär. Diňi Dubaýyň esasy ýoly bolan şeýh Zaýed ýolunda gurmak meýilleşdirilýär.
Belläp geçsek, häzirki wagtda dünýäde iň insiz diň Nýu-ýorkdaky Steinway Tower hasaplanylýar. Ol beýikligi 435 metr bolan 82 gatly ýaşaýyş jaýydyr. Onuň ininiň beýikligine gatnaşygy 1:24-e deň.
