Gonkongda geçirilen Aziýa Tennis federasiýasynyň (ATF) Baş Assambleýasynda Türkmenistanyň Tennis federasiýasy Aziýanyň iň çalt ösýän guramalarynyň biri diýlip ykrar edildi. ATF-nyň başlygy Ýuriý Polskiý Türkmenistanyň Tennis federasiýasynyň başlygy Eziz Döwletowa degişli ýadygärlik sowgadyny gowşurdy diýip, "Türkmenistan: Altyn asyr" neşiri habar berýär.
ATF-iň Baş Assambleýasynyň mejlisi 45 ýurtdan ybarat bu guramanyň döredilmeginiň 60 ýyllygyna bagyşlandy.
Gonkongda E.Döwletow Aziýa Tennis federasiýasynyň wise-prezidenti hökmünde ATF-iň direktorlar geňeşiniň mejlisine gatnaşdy, onda Aziýa sebitinde tennisi ösdürmegiň we ATF-iň howandarlygynda ýaryşlary geçirmegiň meseleleri ara alnyp maslahatlaşyldy.
Türkmenistanyň Tennis federasiýasynyň Aşgabatda 12 ýaşa çenli çagalaryň arasynda Merkezi Aziýa toparynyň çempionatyny guramakdaky işine ozal Aziýa Tennis federasiýasynyň ýokary baha berendigini ýatladýarys. 2023-nji ýylyň iýunynda türkmen paýtagtynyň Olimpiýa şäherçesinde Owganystanyň, Gazagystanyň, Gyrgyzystanyň, Özbegistanyň, Täjigistanyň we Türkmenistanyň toparlarynyň gatnaşmagynda geçirilen sebit çempionatyny ATF-iň ýolbaşçylary tennis ýaryşlaryny guramagyň nusgasy we mysaly diýip atlandyrdylar.
