Horwatiýaly ýarymgoragçy Luka Modriç Madridiň “Realynyň” taryhynda iň uly ýaşly oýunçy bolup, tanymal Ferens Puşkaşyň rekordyny täzeledi.
Bu ispan La Ligasynyň “Selta” garşy 10-njy tapgyr oýnunda bolup geçdi. 63-nji minutda Modriç meýdança çykdy, netijede ol Patyşalyk klubunyň taryhynda iň uly ýaşly oýunçy boldy – 39 ýyl 40 gün.
Luka 1966-njy ýylda 39 ýyl 36 gün ýaşynda bu toparyň düzüminde soňky oýnuny oýnan wengriýaly Ferens Puşkaşyň rekordyny täzeledi.
“Selta” bilen bolan oýunda Modriç bu taryhy üstünligine bir netijeli hereketi-de goşdy. 66-njy minutda ol ýeňiş golunyň (2:1) awtory bolan Winisius Žuniora topy geçirdi.
Modriç “Realda” 2012-nji ýylda Angliýanyň “Tottenheminden” geçeni bäri çykyş edýär. Topar üçin jemi 547 oýna gatnaşyp, 27 kubok gazandy. Ol klubuň taryhynda iň köp titul alan futbolçydyr.
Şeýle-de, Luka 2018-nji ýylyň “Altyn topunyň” eýesidir. Şol möwsümde ol FIFA we UEFA tarapyndan ýylyň iň gowy oýunçysy diýlip hem ykrar edildi.
Madridiň kluby “Seltany” utup (24 utuk), La Liganyň ýaryş jedwelinde öňdebaryjy “Barselonanyň” yzyndan ýetdi, ýöne kataloniýalylaryň ýene bir oýny bar.
La Liganyň indiki tapgyrynda Karlo Ançelottiniň topary 26-njy oktýabrda “Barselonany” kabul eder, ýöne ondan öň 22-nji oktýabrda Çempionlar ligasynyň esasy tapgyrynyň 3-nji tapgyr oýnunda öýünde Dortmundyň “Borussiýasy” bilen oýnar.
