Er-Riýadda geçirilen “Alty şanyň tuwulgasy” (“Six Kings Slam”) tennis ýaryşynyň guramaçylary ispaniýaly tennisçi Rafael Nadala altyn raketka berdiler diýip, “Çempionat” portaly habar berýär.
Bu ýadygärlik baýragy türgeniň tennis dünýäsinde köpýyllyk hyzmatynyň ykrar edilmesi boldy. Nadal “Uly tuwulga” ýaryşlarynyň ençeme gezek çempiony we sportuň bu görnüşiniň taryhynda iň esasy şahsyýetleriň biridir.
Ýaryşyň üçünji ýer ugrundaky oýnunda Nadal serbiýaly Nowak Jokowiçden 2:6, 6:7 hasabynda utuldy.
Six Kings Slam – tennis taryhynda baýrak möçberi rekord bolan ýaryş. Oňa häzirki döwrüň iň gowy tennisçileri gatnaşdy. Olaryň her biri diňe gatnaşandygy üçin azyndan 1,5 mln dollar aldy. Ýaryşyň ýeňijisi – italiýaly Ýannik Sinner bolsa rekord 6 mln dollar gazandy. Deňeşdirmek üçin, ol häzirki möwsümde US Open-de gazanan ýeňşi üçin 3,6 mln dollar aldy.
10-njy oktýabrda Rafael Nadal 2024-nji ýylyň 19 – 24-nji noýabrynda Malagada geçiriljek Dewisiň Kubogyndan soň professional karýerasyny tamamlamak kararyna gelendigini mälim etdi.
