BAE-niň paýtagty Abu-Dabide dünýäde ikinji şar görnüşli ekran binasy “Sphere” peýda bolar. Bu barada Variety neşiri habar berýär.
Birinji Sphere dynç alyş meýdançasy – gümmez 2023-nji ýylyň sentýabr aýynyň ahyrynda ABŞ-nyň Las-Wegas şäherinde açyldy. Bu dünýäde iň uly şar görnüşli bina bolup, onuň ini 157 metre, beýikligi 112 metre barabar. Tutuş Sphere boýunça gurnalan daşarky displeýleriň netijesinde binada islendik şekil görkezilip bilner. Binanyň gurluşygyna 2 mlrd dollardan gowrak serişde sarp edildi. Ol 18 600 adamy sygdyryp bilýär.
Variety neşiriniň habar bermegine görä, ikinji Sphere binasynyň gurluşygy barada Sphere Entertainment Co. we Abu-Dabiniň Medeniýet we syýahatçylyk departamenti bilelikdäki beýanda habar berdiler. Ýöne gurluşyň başlanjak ýa-da açyljak senesi görkezilmedi.
“Sphere konsepsiýasy hemişe global meýdançalar ulgamyny öz içine alýardy, şu günki bildiriş hem bu maksada ýetmekde möhüm tapgyrdyr” – diýip, Sphere Entertainment kompaniýasynyň ýerine ýetiriji başlygy we baş müdiri Jeýms L.Dolan belledi.
Neşir ilkibaşda kompaniýanyň ikinji Sphere binasyny Londonda gurmak isländigini, ýöne şeýle binany gurmak meýilnamalarynyň şäher ýaşaýjylarynyň we häkimiýetiniň nägileligine sezewar bolandygyny belleýär.
