Drezdeniň (Germaniýa) “Dresden Sinfoniker” simfoniki orkestri döredilmeginiň 25 ýyllygyny adaty bolmadyk konsert bilen belledi: çykyşyň ýarty bölegini üç elli robot alyp bardy diýip, knews.kg habar berýär.
The Guardian neşiriniň habar berşi ýaly, robot adamlary çalyşmak üçin däl-de, sazda adamlaryň maşynlar bilen bilelikde işleşip biljekdigini görmek üçin niýetlenildi.
Konsert iki bölekden ybarat boldy: birinjisi, adamyň ýolbaşçylygyndaky däp bolan çykyş, ikinjisi bolsa robot tarapyndan dolandyrylan bölegi. Magnus Loddgardyň ýolbaşçylygyndaky birinji bölümde üflenip çalynýan saz gurallary bilen on alty sazanda, kakylyp çalynýan saz gurallary bilen dört deprekçi aýdym-sazlary ýerine ýetirdi.
Ondan soň, ikinji bölümde MAiRA roboty ritmi kesgitlemek üçin dürli reňkli üç sany yşyklandyrylan taýagy aldy. Orkestr hem üç bölege bölündi, sazlaşykly kesişme ritmlerini emele getirmek üçin olaryň hersi öz “taýagyny” yzarlady.
Maglumatlara görä, Wilanda Reýsmanyň "#kreuzknoten" filminiň dünýä premýerasyna robot režissýorlyk edipdir. Bu eserlerde çylşyrymly kesişme ritmleri bolany sebäpli adam dirižýor üçin kynçylyk döredýär. Şeýle hem, orkestr robotyň ýolbaşçylygynda kompozitor we pianinoçy Andreas Gundlahyň üç elli dirižýor üçin ýörite ýazan eserini ýerine ýetirdi.
Robot "Dresden Sinfoniker" simfoniki orkestriň çeper ýolbaşçysy Markus Rindtdan tälim aldy. Ol konserti guramak üçin Drezden Tehniki uniwersitetiniň taktiki internet Merkeziniň hünärmenleri we “Hudam-in-the-Loop” bilen hyzmatdaşlyk etdi. Rindt iki ýyllap MAiRA-a orkestri alyp barmagy öwretdi we her el hereketini 40 gezek gaýtalap görkezdi. Robotyň her “golunyň” ähli tarapa hereket etmegine we uzalmagyna mümkinçilik berýän ýedi bognunyň bardygy bellendi.
