Paraplanerist Aleks Lang uçuş wagty Gizadaky Beýik piramidanyň (Heops piramidasy) çür depesindäki iti tötänleýin wideo düşürdi. Ol bu kadrlar bilen Instagram sahypasynda paýlaşdy diýip, RBK habar berýär.
Wideodan görnüşi ýaly, it beýikligi tas 140 m bolan, ýagny 40 gatly bina bilen deňleşýän gadymy piramidanyň çür depesine çykypdyr. Ýöne onuň muny nähili başarandygy belli däl. Ähtimal, it guşlar bilen güýmenip, gadymy gurluşyň depesine çykan bolsa gerek.
Ulanyjylar bu iti, köplenç, it kellesi bilen şekillendirilýän Gadymy Müsür Hudaýy Anubis bilen deňeşdirdiler. Bu Hudaý ölüleriň dünýäsine ýol görkeziji we aramgähleri goraýjy hasaplanylýar.
Ulanyjylary bu itiň nähili aşak düşendigi-de gyzyklandyrdy. Ertesi gün Aleks Langyň ýoldaşy, paraplanerist Marşall Moşer itiň ýere sag-aman düşendigini habar berdi.
Piramida bloklarynyň beýikligi piramidanyň aşaky derejelerinde 1-1,5 m barabar, ýokary derejelerde bolsa beýiklik 0,5 m çenli kiçelýär.
Gizanyň Beýik piramidasy ýa-da Heops piramidasy b.e.öň, takmynan, 2560-njy ýylda gurlupdyr. Bu piramida Giza belentligindäki üç piramidanyň iň ulusy hasaplanýar. Şol wagt onuň beýikligi, takmynan, 146,6 m bolup, bu ony 3800 ýyldan gowrak wagtyň dowamynda dünýäde iň beýik gurluşa öwürdi.
Piramidanyň gurluşygy, takmynan, 20 ýyl dowam edip, oňa 100 müňden gowrak işçiniň gatnaşmagy gerek bolupdyr. Piramida her biriniň agramy 2-den 15 tonna çenli bolan 2,3 milliondan gowrak hek bloklaryndan ybarat.
