Milanda geçirilen Halkara astronawtika kongresinde Aý missiýalary üçin niýetlenen täze skafandrlaryň tanyşdyrylyş dabarasy boldy. Olar Prada modalar öýüniň dizaýnerleri bilen hyzmatdaşlykda Axiom Space hususy kosmos kompaniýasy tarapyndan işlenip düzüldi diýip, Reuters habarlar gullugy habar berýär.
Döwrebap innowasiýa materiallaryndan taýýarlanan bu skafandrlar Aýyň ýagty düşýän günorta polýusynyň aşa ýokary temperaturasynda bolşy ýaly, Aýyň hemişe kölegedäki sebitiniň pes temperaturasyna hem çydamlydyr.
Her bir skafandr astronawtlar üçin açyk kosmosda azyndan sekiz sagat amatly şertleri saklamaga ukyplydyr.
Bu skafandrlar NASA-nyň 2026-njy ýylyň güýzünde meýilleşdirilýän Artemis III missiýasyna taýýarlyk görmekde möhüm ädim bolar. Bu missiýa 1972-nji ýyldan bäri Aýa adamyň ilkinji gonuşy bolar.
Ondan öň, 2025-nji ýylda Artemis II türgenleşik missiýasy amala aşyrylar, şol döwürde astronawtlar Ýeriň hemrasynyň töwereginden aýlanyp gaýdarlar.
