Braziliýanyň Milli ykdysady we sosial ösüş banky elektrik “uçýan awtomobilleri” öndüriji zawodyň gurluşygyna, takmynan, 100 mln dollar maýa goýjakdygyny mälim etdi. “Dik uçuş we gonuş ulag serişdesiniň” (eVTOL) tapgyrlaýyn önümçiligi eýýäm 2026-njy ýylda başlamaly.
Täze ykjam uçýan enjamyň konsepti Braziliýanyň Embraer awiagurluşyk korporasiýasy tarapyndan heniz 2018-nji ýylda hödürlendi, 2022-nji ýylda bolsa onuň golçur kompaniýasy Eve Air Mobility ýerli raýat awiasiýasy agentliginde eVTOL-y ygtyýarnamalaşdyrmak prosesine başlady.
Braziliýanyň aeromobili daşky görnüşi boýunça dikuçaryň, uçaryň we kwadrokopteriň gibridine meňzeýär. Ol fýuzelýaždan, sekiz sany dik çekiş hereketlendirijisini saklaýan ganatlardan we eVTOL-y herekete getirýän hereketlendirijili guýrukdan ybarat. Salon uçarmana we dört ýolagça niýetlenýär. Hereket tizligi sagatda 100 km, uçuş aralygy bolsa 100 km bolar. Awtomobiliň bahasy dikuçardan alty esse arzan, galmagaly bolsa 90% pese bolar. eVTOL-yň doly elektrik ulag serişdesidigi bellenilýär.
Täze zawod Taubate şäherinde (San-Paulu ştaty) Embraer-iň esasy önümçilik desgalarynyň golaýynda gurlar. Eýýäm iki ýyldan kompaniýanyň uçýan awtomobiliň ilkinji tapgyrlaýyn nusgasyny çykarmagyna garaşylýar. Önümçiligi bazaryň zerurlyklaryna görä kem-kemden artdyrmak meýilleşdirilýär. Ýöne gysga möhletde zawodyň ýylda 480 enjam ýygnap biljekdigi eýýäm belli. Eve Air Mobility-nyň eýýäm dünýäniň 13 ýurdundan eVTOL üçin tas üç müň deslapky sargyt bukjasy bar.
