Hytaýyň United Aircraft Group uçar tehnikasyny öndürijisi dünýädäki iň uly uçarmansyz uçýan Lanying R6000 konwertoplan uçaryny hödürledi. 6 tonnalyk bu apparat 2 tonna çenli ýüki götermäge we uçarmansyz hem-de uçarmanly uçuşlary amala aşyrmaga ukyplydyr diýip, Interesting Engineering habar berýär.
Uçaryň ganatynyň uzynlygy 16,1 metr, beýikligi bolsa 4,6 metr. Ýük bölüminiň göwrümi 12 kub metre ýetýär. Häzirki wagtda bu Hytaýda öndürilen iň uly uçarmansyz ulag laýneri.
Lanying R6000 öwgä mynasyp häsiýetnamasy bar:
- Uçuş uzaklygy: 4000 km-e çenli;
- Iň ýokary tizligi: sagatda 550 km;
- Uçuşyň kreýser beýikligi: 7620 metr;
- Göwrümi: 10 ýolagça çenli.
Lanying R6000 dik uçup-gonup biler we dikuçar ýaly howada saklanyp biler. Özboluşly mümkinçilikleriniň bardygy sebäpli ol ulag, logistika, harby we gözleg-halas ediş işleri üçin amatly.
Tomusda kompaniýa ilkinji üstünlikli synag uçuşyny amala aşyrdy. Uçarmansyz uçýan apparat ähli ulgamlarynyň durnukly işleýändigini görkezdi.
Lanying R6000 taslamasynyň üstünde 10 ýyldan gowrak wagt bäri işlenip gelýär. Onuň köpçülikleýin önümçiligini guramak üçin 200-den gowrak kärhana çekildi, olar barlaglardan we işläp taýýarlamakdan başlap, tehniki hyzmatyna, ulanylyşyna we öwredilişine çenli başdanaýak döredilişiniň doly aýlawyny üpjün etdi.
Uçarmansyz uçýan apparatyň önümçiligini Hefeýde ýerleşýän Uhu awiasiýa senagat seýilgähinde başlamak meýilleşdirilýär.
