Hytaýyň Henan welaýatynda arheologlar ýaşy, takmynan, 5 müň ýyl diýlip hasaplanylýan gadymy aramgähi tapdylar. Tapyndy Hytaý siwilizasiýasynyň gelip çykyşy barada täze maglumatlary berip biler diýip, “Sinhua” agentligi habar berýär.
M27 hökmünde bellenilen aramgäh Şansýu şäheriniň çäginde ýerleşip, Dawenkou medeniýetine degişlidir. Ylmy gözlegçiler onda ýokary statusly adamyň, ähtimal, gadymy hökümdaryň jaýlanandygyny çaklaýarlar.
Arheologlar 17 metrlik aramgähiň içinde ýaşmadan, keramikadan we pil süňkünden ýasalan predmetleri öz içine alýan 350 töweregi artefakt tapdylar. Şeýle-de, alymlar baýlygy alamatlandyrýan doňuzlaryň aşaky äňlerini tapdylar. Bellenilişi ýaly, aramgähiň ululygy we artefaktlaryň sany munuň Dawenkou medeniýetiniň iň uly mazarlarynyň biridigini görkezýär.
“Bu açyş Wançžuan harabalygynyň adaty ilatly ýer däl-de, eýsem taryhdan öňki gadymy Huaýi şalygynyň paýtagtydygyny görkezýär” – diýip, “Şoudu” pedagogika uniwersitetiniň taryh fakultetiniň dosenti Çžu Guanhua hasaplaýar.
2024-nji ýylda bu arheologiki ýerde alymlar jaýlananlaryň ýokary sosial ýagdaýyny görkezýän artefaktlar bilen 45-den gowrak aramgähi tapdylar. Dawenkou medeniýeti häzirki Şandun, Anhoý, Henan we Szýansu welaýatlarynyň çäklerinde b.e.öň 4100-2600-nji ýyllarda hereket edipdir. Taryhçylaryň pikiriçe, tapyndylar eýýäm şol döwürde jemgyýetiň gatlaklara bölünendigini delillendirýär.
