Germaniýaly hünärmen Tomas Tuhel Angliýanyň milli ýygyndysynyň baş tälimçisi wezipesine bellenildi. Bu barada Angliýanyň Futbol assosiasiýasynyň saýtynda habar berilýär.
Iýul aýynda Garet Sautgeýt Angliýanyň milli ýygyndysynyň baş tälimçisi wezipesinden gidýändigini mälim etdi. Ondan öň topar Germaniýada geçirilen Ýewropa çempionatynyň finalynda Ispaniýadan utulyp (1:2), yzygider ikinji gezek ýaryşyň kümüş medalyny gazandy.
Germaniýaly hünärmen 2025-nji ýylyň ýanwaryndan milli topar bilen işleşip başlar. Onuň kömekçisi angliýaly Entoni Barri bolar. Li Karsli Milletler ligasynyň Gresiýa (14-nji noýabr; myhmançylykda) we Irlandiýa (17-nji noýabr, öýde) garşy noýabr oýunlarynda milli ýygyndynyň baş tälimçisiniň borçlaryny ýerine ýetirmegi dowam eder, şondan soň ýaşlar ýygyndysyna gaýdyp barar.
“Men Angliýanyň ýygyndysyna ýolbaşçy bolmak hormatyna eýe bolandygyma buýsanýaryn. Men iňlis futboly bilen şahsy baglanyşygymy öňden bäri duýýaryn, bu eýýäm maňa birnäçe täsin pursaty sowgat etdi. Angliýa wekilçilik etmek mümkinçiligi – aýratyn bir ýagdaý. Bu üýtgeşik we zehinli oýunçylar topary bilen işleşmek örän tolgundyryjy” – diýip, Tuhel belledi.
Tuheliň soňky iş ýeri Mýunheniň “Bawariýasy” boldy. Onuň ýolbaşçylygynda topar 2022/23 möwsüminiň jemi boýunça Germaniýanyň çempiony boldy.
