Renault-yň baş müdiri Luka de Meonyň gymmat bolmadyk gibrid tehnologiýasyna bil baglamagy eýýäm öz miwesini berdi. Fransiýaly awtoöndüriji Ýewropada çalt ösýän gibrid awtomobil bazarynda haýran galdyryjy netijeleri görkezýär diýip, IXBT habar berýär.
2024-nji ýylyň ilkinji sekiz aýynda Renault-yň Clio we Captur ýaly gibrid modelleriniň satuwy geçen ýyl bilen deňeşdirilende 55% ýokarlanyp, bazaryň ortaça ösüşinden 21,1% öňe geçdi. Bu hem Renault-a Ýewropada gibrid satuwy boýunça ikinji orna çykmaga mümkinçilik berdi. Kompaniýa bu ugurda diňe Toyota-dan yza galýar.
Renault-yň üstünlik gazanmagynyň esasy şerti E-Tech tehnologiýasy boldy. Hereket geçiriji guty ugrunda öz innowasiýalary bilen belli bolan fransuz kompaniýasy gymmat däl we netijeli gibrid transmissiýany üpjün edýän ýönekeýleşdirilen “kulak muftasy” ulgamyny işläp düzdi. E-Tech beýleki gibrid ulgamlaryna garanyňda az komponent talap edýär, bu hem ony ýeňil we baha taýdan elýeterli edýär.
“Kompaniýa bäsdeşlerine garanda has köptaraply we çeýe” – diýip, hünärmenler belleýär.
Renault E-Tech-iň netijesinde elektromobiller bilen gibridleriň arasynda deňagramlylygy tapmagy başardy, bu kompaniýa bazaryň beýleki gatnaşyjylaryndan artykmaçlyk berýär.
Dataforce we S&P Global konsalting kompaniýalarynyň bilermenleri gibrid awtomobillere bolan islegiň onýyllygyň ahyryna çenli artjakdygyny çaklaýarlar. Renault-yň hem öz strategiýasynyň we elýeterli gibrid tehnologiýasynyň netijesinde bu ösüşden peýdalanmak üçin gowy mümkinçiligi bar.
