Britaniýaly plastik hirurgy Julian de Silwa “altyn kesişme” ýörelgesi boýunça iň syratly erkek adamlaryň ilkinji onlugyny düzdi. 2024-nji ýylyň reýtinginde öňdebaryjy 34 ýaşly aktýor Aaron Teýlor-Jonson boldy diýip, Daily Mail habar berýär.
Maglumatlara görä, aktýor “agent 007” franşizasynda täze Jeýms Bonduň roluny alyp biler, ol “Anna Kareninada” (2018, režissýor Jo Raýt) Wronskiniň roluny hem ýerine ýetirdi.
Hünärmeniň pikiriçe, aktýoryň ýüzi “altyn kesişmä” 93,04% laýyk gelýär. Onuň ýüzüniň süýrümtik şekili (99,2%) we burny (98,8%) ideal diýen ýaly. Eňek bolsa “altyn kesişmä” 95%, gözleriň arasyndaky aralyk 89%, burun bilen dodagyň arasyndaky aralyk 89,6%, dodaklaryň özi bolsa 86% laýyk gelýär.
Ikinji orny “Emili Parižde” melodramasynyň ýyldyzy Lýusýen Lawiskonta eýeledi (92,41%). Bürünç medaly Pol Meskal aldy (92,38%). Irlandiýaly aktýor noýabr aýynda Ridli Skottuň täze “Gladiator 2” filminde baş keşpde peýda bolar.
Dördünji orunda “Alagaraňkylyk” we “Betmen” filmleriniň ýyldyzy Robert Pattinson (92,15%), bäşinji orunda “Ýüzükleriň hökümdary: Hökmürowanlyk ýüzükleri” serialyndan aktýor Jek Lauden (90,33%) ýerleşdi.
Altynjy orny Golliwudyň weterany Jorj Kluni (89,9%), ýedinji orny “Telbe Maks: Gazap ýoly” blokbasteriniň ýyldyzy Nikolas Holt (89,84%) eýeledi.
Bularyň yzyny “Maý dekabr” dramasyndan we “Riwerdeýl” serialyndan Çarlz Melton (88,46%) hem-de Idris Elba (87,94%) dowam etdirýär. Onlugy hindi aktýory Şah Rukh Khan jemleýär (86,76%).
Geçen ýyl reýtingiň lideri Rege-Žan Peýj (“Brijertonlar” serialynda gersog Gastings) boldy. Onuň ýüzi “altyn kesişmä” 93,65% laýyk geldi. Öňdebaryjylaryň üçlügine Kris Hemswort (93,53%) we Maýkl B.Jordan (93,46%) hem girdi.
