Ispaniýaly tennisçi Rafael Nadal professional karýerasyny tamamlady. Bu barada türgen sosial ulgamlarynda habar berdi.
“Hakykat şeýle, bu kyn ýyllar boldy, aýratynam, soňky iki ýyl. Men çäklendirmesiz oýnap bilerin öýdemok. Bu, elbetde, esli wagtymy alan kyn çözgüt boldy. Ýöne bu durmuşda ähli zadyň başlangyjy we soňy bar. Meniň pikirimçe, bu göz öňüme getirişimden has uzak we üstünlikli bolan karýeramy soňlamagyň tüýs wagty” – diýip, ol aýtdy.
Şeýle-de, Nadal soňky ýaryşynyň Dewisiň Kubogy boljakdygyna begenýändigini sözüniň üstüne goşdy. Bu ýaryşda türgen öz ýurduna wekilçilik eder. Ýaryş 19 – 24-nji noýabrda Ispaniýanyň Malaga şäherinde geçiriler.
Nadal 2001-nji ýylda professional derejede çykyş edip başlady. Karýerasynyň dowamynda iki gezek Olimpiýa çempiony boldy (2008-nji ýylda Pekinde ýekelikde we 2016-njy ýylda Rio-de-Žaneýroda jübüt görnüşde), ençeme gezek “Uly tuwulga” ýaryşlarynda ýeňiji boldy: Rolan Garros, Wimbledon, US Open, Australian Open. Ispaniýalynyň ýekelikde 92 tituly bar. Ol 209 hepde dünýäniň birinji raketkasy boldy.
