Bloomberg agentliginiň habar bermegine görä, Apple korporasiýasy öz önümleriniň täze wersiýalaryny her ýyl çykarmakdan ýüz öwrüp biler. Bu barada agentligiň habarçysy we belli insaýder Mark Gurman aýdýar.
Häzir Apple öz gurluşlarynyň täze wersiýalaryny her ýyl hödürleýär, ýöne geljekde kompaniýa önümleri diňe doly taýýar bolanda çykarmak bilen, has çeýe çemeleşmä geçip biler. Bu has ýokary hilli we özboluşly gurluşlary döretmäge mümkinçilik berer.
Gurman her ýyl ähli gurluşlary täzelemegiň netijesizdigini we eýýäm häzir Apple-iň iPad, Apple Watch we MacBook ýaly käbir önümlerini yzygiderli çykarmaýandygyny belleýär. Muňa garamazdan, iPhone durnukly ýagdaýda ýylda bir gezek çykmagyny dowam etse gerek.
Şeýle-de, Gurman Apple-iň akylly ýüzük döretmek taslamasyny ýapmak kararyna gelendigini aýdýar. Şeýle çözgüdiň sebäbi täze dakylýan gurluşyň brendiň esasy önümleriniň biri bolan Apple Watch sagatlarynyň satuwyna ýaramaz täsir edip bilmegi boldy. Kompaniýa bu habara teswir bermekden saklandy.
Ýatlap geçsek, öň Apple-iň tiz wagtdan akylly ýüzük hödürlejekdigi barada gürrüňler peýda boldy. Awgust aýynda Vision Pro garniturasy bilen bilelikde işlemäge ukyply akylly ýüzük üçin patent barada belli boldy. Bu gürrüňleriň Samsung öz Galaxy Ring gurluşyny çykarandan soň peýda bolandygyny bellemek gerek.
