Telegram öz messenjeri üçin täze wideopleýer döretmek maksady bilen, dünýäniň dürli künjeginden işläp düzüjileriň arasynda bäsleşik yglan etdi. Ýeňiji 2024-nji ýylyň noýabr aýynda yglan ediler, onuň çözgüdi bolsa programma goşular.
Pleýer ilki iOS-da, soňra bolsa Android-de we messenjeriň PK üçin görnüşinde peýda bolar.
Täze wideopleýer häzirki AVPlayer-iň ornuny tutar we wideonyň hilini internet tizligine awtomatiki sazlaýan HLS akymyny goldar. Bar bolan çözgütden tapawutlylykda, pleýer brauzer ulanmazdan, Telegramyň içinde işlär. Döredijiler JavaScript we ýerli kod ulanyp, gibrid çözgüt hödürläp bilerler.
Arzalar 2024-nji ýylyň 25-nji oktýabryna çenli kabul ediler. Iň oňat çözgüdiň awtory 50 müň dollar alar.
Pleýerde maslahat beriş ulgamynyň boljagy-bolmajagy entek belli däl. Hünärmenler olaryň peýda bolmagy Telegram-a YouTube bilen bäsleşmäge mümkinçilik berer diýip hasaplaýarlar. Messenjeriň işjeň ulanyjylarynyň sany tas 1 milliarda ýetdi. YouTube bu ugurda öňdebaryjy bolmagynda galýar - wideohosting sahypasyna 2,5 milliard adam girýär.
