Tehasda (ABŞ), Marfa şäheriniň çetinde 3D çap usulynyň kömegi bilen gurlan dünýäde ilkinji oteli döretmek taslamasy durmuşa geçirilýär. Myhmanhana we kemping hökmünde hereket edýän El Cosmico oteli 16 gektar meýdanda 43 myhmanhana otagynyň we 18 ýaşaýyş jaýynyň goşulmagy bilen giňeldiler diýip, Smithsonian Magazine neşiri habar berýär.
El Cosmico-nyň eýesi Liz Lambert taslamany 3D çap usulyna ýöriteleşen ICON kompaniýasy we Bjarke Ingels Group binagärlik topary bilen bilelikde durmuşa geçirýär.
Desga ICON-dan Vulcan 3D printeriniň ulanylmagy bilen gurulýar. Gurulýan ilkinji iki bloguň bir gatly diwarlary (beýikligi 3,7 metr) üç ýatylýan otagly ýaşaýyş giňişligi we bir otagly myhmanhana blogudyr. Olar Lavacrete atly semente esaslanýan ýörite materialdan çap edilýär.
Bu garyndy berklik we uly göwrümlilik üçin işlenip taýýarlandy, şol sebäpli iri gurluşyk desgalary üçin amatlydyr. Işçiler garyndylary howa şertlerine baglylykda sazlaýarlar we garýarlar, sebäbi çyglylyk, temperatura we ýagtylyk materialyň ýagdaýyna we hatda ahyrky reňkine-de täsir edýär.
Lambertiň aýtmagyna görä, bu tehnologiýa adaty gurluşyk usullary bilen durmuşa geçirmek kyn bolan özboluşly binagärlik çözgütlerini döretmäge mümkinçilik berýär.
El Cosmico-nyň giňeldilmeginiň 2026-njy ýyla çenli tamamlanmagyna garaşylýar. Täze otelde ýaşaýşyň bahasy bir gije üçin 200 – 450 dollar aralygynda bolar.
Hünärmenler 3D çap usulynyň geljekde hünärli zähmeti talap edýän iş orunlarynyň sanyny azaltmak bilen, gurluşyk pudagyna uly täsir edip biljekdigini belleýärler.
