Ýaponiýanyň MegaHouse kompaniýasy Rubigiň kubiginiň dünýäde iň kiçijik modelini hödürledi. Ol şeýle bir kiçi welin, ony düzmek üçin jüpdek (pinset) gerek bolup biler diýip, CNN habar berýär.
Bu Rubigiň kubigi alýuminden ýasaldy we onuň her tarapy 5 mm bolup, agramy bary-ýogy 0,3 g barabar. Bu ini 2,2 dýuým töweregi (5,6 sm) bolan asyl kubigiň ölçeginiň, takmynan, müňden bir bölegidir.
MegaHouse kompaniýasy bu Rubigiň kubiginiň konsepsiýasynyň üstünde dört ýyl ozal işlenip başlanandygyny, önümçiligiň bolsa 2022-nji ýylda başlandygyny aýtdy. Şu ýylyň awgust aýynda Ginnesiň rekordlar kitaby bu kubigi dünýäde iň kiçijik aýlanýan tapmaça kubigi diýip ykrar etdi.
MegaHouse kompaniýasy tarapyndan ýasalan Rubigiň kubigi 2016-njy ýylda 5,6 mm ölçegde kubigiň öz wersiýasyny döreden britaniýaly dizaýner Toni Fişeriň rekordyny täzeledi.
Mikrokubigiň bahasy, takmynan, 5320 dollara barabar. Ýokary bahasy sebäpli ol gündelik türgenleşmeler üçin tapmaça gurluşy däl-de, has dogrusy, kolleksiýa predmeti bolsa gerek. Her bir nusga “Dünýäde iň kiçijik Rubigiň kubigi” ýazgysy bilen satylýar.
Model 1974-nji ýylda wengriýaly professor Erne Rubik tarapyndan oýlanyp tapylan asyl Rubigiň kubiginiň döredilmeginiň 50 ýyllygyna bagyşlanýar. Kubik deslapky sargyt üçin eýýäm elýeterli, onuň üpjünçiligi indiki ýylyň aprel aýynda başlar.
