Pitchfork neşiri 2020-nji ýyllaryň iň gowy 100 albomynyň sanawyny hödürledi. Reýtingde birinji orny 2020-nji ýylyň 17-nji aprelinde çykan Fetch the Bolt Cutters albomy bilen Fiona Eppl eýeledi. Art-pop aýdymçynyň bäşinji studiýa albomyna wokal, şeýle-de aýdym-saz gurallary hökmünde hojalyk predmetleriniň ulanylyşy üçin ýokary baha berildi. Eppl aýdymlary, esasan, Wenis-Biçdäki öýünde ýazdy we bu hem pandemiýa döwürlerinde diňleýjileriň ünsüni özüne çekdi.
Albom 63-nji Gremmi baýragynyň gowşurylyş dabarasynda alternatiw aýdym-saz kategoriýasynda iň gowusy diýlip ykrar edildi, “Shameika” aýdymy bolsa iň gowy rok ýerine ýetirilişi üçin baýrak aldy. Şeýle-de, albom Metacritic internet agregatorynda 100 baldan 100 bal alyp, saýtyň taryhynda 100 bal alan ilkinji albom, şeýle-de onuň taryhynda iň ýokary baha alan albom boldy.
Sanawda ikinji orny repçi Playboi Carti-niň batyrgaý stil dekonstruksiýasy üçin ýokary baha alan Whole Lotta Red albomy (2021) eýeledi.
Üçünji orunda Cinde Lee toparynyň Diamond Jubilee albomy (2024) ýerleşdi. Syn berijiler toparyň lideri Patrik Flegeliň aýdymlarynyň köne modalylygyna, şeýle-de “olaryň döredijiliginiň elýeterli bolmazlygyna” ýokary baha berdiler – olaryň aýdymlary akym platformalarynda ýok, olar winil we disk diňleýjileri üçin hem elýeterli däl.
Iň gowy albomlaryň ilkinji onlugy şu aşakdakylardan ybarat:
- Fiona Eppl — Fetch the Bolt Cutters (2020)
- Playboi Carti — Whole Lotta Red (2021)
- Cindy Lee — Diamond Jubilee (2024)
- SZA — SOS (2022)
- Beýonse — Renaissance (2022)
- Veeze — Ganger (2023)
- Charli XCX — Brat (2024)
- Rozaliýa — Motomami (2022)
- Chuquimamani-Condori — DJ E (2023)
- Waxahatchee — Saint Cloud (2020)
Şeýle-de, ilkinji 30 albomyň arasynda Lana Del Reýiň, FKA Twigs-iň we Kendrik Lamaryň albomlary-da bar, ýöne The Weeknd, Dua Lipa we Teýlor Swift ýaly aýdymçylaryň albomlary hatda ilkinji 50-lige-de girmedi.
